Investeringer i olje og gass, industri, bergverk og kraftforsyning, 4. kvartal 2008

Førebelse tal for 2008 syner at samla investeringar i industri, bergverksdrift og kraftforsyning vil liggje på om lag 49,7 milliardar kroner - målt i løpande prisar. Dette gir ein auke på 22 prosent samanlikna med tilsvarande tal for i fjor. Tala for 2009 syner ein moderat nedgang i investeringane. Avslutning av nokre store prosjekt i industrien er ei medverkande årsak til denne utviklinga.

Høge investeringar i oljeraffinering og solcellerelatert verksemd

Tala for 2008 syner at samla investeringar i industrien vil liggje på om lag 33,4 milliardar kroner, målt i løpande prisar. Resultatet er 23 prosent høgare enn tilsvarande tal for 2007 og om lag uendra frå august-undersøkinga. Bygging av nye fabrikkanlegg og omfattande oppgraderingar innanfor oljeraffinering og solcellerelatert verksemd er hovudårsaka til dette. Omstruktureringar i nærings- og nytingsmiddelindustrien medverkar også til å trekkje opp tala. Andre næringar med merkbar auke i investeringane er metallindustri og trelast- og trevareindustri. Eit stort prosjekt i mineralproduktindustrien blei avslutta i 2007. Dette gir eit kraftig fall i investeringane for denne næringa. Treforedlingsindustrien melder også om merkbar nedgang i investeringane.

Resultata for 2009 er 10 prosent lågare enn tilsvarande tal for i år. Avslutning av fleire store prosjekt innanfor solcellerelatert verksemd er ei viktig årsak til dette. Andre næringar som ventar nedgang i investeringane er nærings- og nytingsmiddelindustri, metallvareindustri og maskinvareindustri. Eit nytt stort prosjekt innanfor gjenvinning er med på å trekkje opp tala for annan industri.

Tala for investeringar i bergverksdrift i 2009 er kraftig nedjusterte frå august-undersøkinga. Vedtak om utsetjing av eit nytt stort prosjekt er ei medverkande årsak til dette. Førebelse tal for 2008 syner at samla investeringar i inneverande år vil liggje på i overkant av 1 milliard kroner.

Ventar auka investeringar i kraftforsyning

Førebelse tal for kraftforsyning syner at samla investeringar i 2008 vil liggje på om lag 15,4 milliardar kroner, målt i løpande prisar. Dette er gir ein auke på 20 prosent samanlikna med tilsvarande tal for i fjor. Tala for 2009 syner ein ytterlegare oppgang i investeringane. Fleire store prosjekt knytt til produksjon av fjernvarme medverkar til å trekkje opp tala.